चालता चालता...

एकदातरी...

चालता चालता वाटलं ...
                                 एकदातरी
                  मागे वळून पहावं,
मिट्ट पसरलेल्या काळोखात...
                                 एकदातरी
                 हाक मारून पहावं...

प्रकाशाकडे झेप घेतांना...
                                 एकदातरी...
                    अंधारात गुदमरलेल्या भावंडांना ...
                                 एकदातरी...
                   मदतीचा हात देऊन पहावं...

पंच पक्वान्नांवर ताव मारतांना...
                                  एकदातरी...
                     भुकेलेल्यांना दोन घास देऊन पहावं...


स्वतःसाठी रोज जगतांना...
                                  एकदातरी
                      दुसर्यासाठी काहीतरी करून पहावं

स्वार्थाच्या मायेला झटकून...
                                  एकदातरी...
                   परमार्थाची ऊब ओढून पहावं...


जखमांनी वेढलेल्या या जगात...
                             .. एकदातरी...
                    कुणाची तरी  खपली होऊन पहावं...
     
                                   श्रीहर्ष (२२ नोव्हेंबर २०११)